Eamiálbmotnissonat gillájit máŋggageardásaččat struktuvrralaš vealaheamis
Nissot ja mánat
Julggaštusas eamiálbmogiid vuoigatvuođaid birra mii dohkkehuvvui ON:a genáralasearvegottis 13 b.čakčamánus 2007 fuomášuvvo maiddái nissoniid dilli. 22 artihkkalis dadjojuvvo ahte stáhtat galget ovttasráđiid eamiálbmogiiguin bidjat johtui doaimmaid mat dorvvastit ahte eamiálbmotnissoniin ja mánáin leat dievas suodjalus ja ollislaš dáhkádusat gaitlágán vealaheamis ja veahkiválddis.
- Lea buorre go nissoniid hearkkes dilli fuomášuvvo ON:a julggaštusas muhto dal lea guoskevaš riikkaid ja earenoamážit eamiálbmotservodagaid geatnegasvuohta váldit dán duohtan, lohká Sámedikki ságadoalli Sylvia Simma.
- Mii eat oačču čiehkat dan ahte earret struktuvrralaš vealaheapmi man nissonat šaddet gillát sohkabeali sivas, de gávdno maiddái struktuvrralaš vealaheapmi sámiin almmolaččat ruoŧa servodagas, joatká Sylvia Simma.
Diehtomeahttunvuohta
- Ahte gávdno stuora diehtomeahttunvuohta sámiid birra Ruoŧas lea dovddus muhto diehtomeahttunvuohta sámi nissoniid dili birra lea vel vuđoleabbu. Varas ON-raporta vuoseha ahte Ruoŧŧa ii leat fuomášan sámi nissoniid dili Ruoŧas. Sii ellet árbevirolaččat patriarkálalaš birrasis ja sis lea váttis oažžut veahki jus šaddet gillát veahkaválddi isidis, deattuha Sylvia Simma.
Dásseárvobargu
Sámi nissoniid dilli politihkalaš mearridandoaimmas, earenoamážit Sámedikkis lea hearki. Danin lea ráđđehus easka mearridan juolludit 1,5 milj. ruvnnu Sámediggái jagis 2008 dásseárvobargui man Sámediggi lea álggahan. Sámedikki ulbmil lea ahte mearrideaddji searvegottis galgá leahkit dássálaš sohkabealjuohkin maŋŋel válgga 2013. - Ráđđehusa mearrádus ahte doarjut Sámedikki dásseárvobarggu lea positiivvalaš muhto ruoŧa ráđđehus ja riikkabeaivi dárbbašivčče gal garrasit doaibmagoahtit dan guvlui ahte ollasit bissehit struktuvrralaš vealaheami ja duođalaš vealaheami sámi nissoniin mii gávdno sihke ruoŧa ja sámi servodagain, loahpaha Sylvia Simma, Sámedikki ságadoalli.
Oktavuohta
Sylvia Simma, 070-288 32 24