Ruđat gealboloktemii ja diehtojuohkin- doaimmaide
Eanandoallodoaimmahat almmuha dál 31,5 miljovnna kruvnno gealboloktemii. Ulbmilin lea ahte diehtojuohkindoaimmaid bokte nannet eanandoalu gilvonávccaid, gávnnahit ođđa oanehis biebmogálvojođáldaga ja báikkálaš márkaniid, ja dasa lassin háhkat ođđa bargosajiid báikegottiide. Dát ruđat gávdnojit báikegoddeprográmma vuolde, ja daid sáhttet organisašuvnnat, fitnodagat ja eiseválddit ohcat.
Ruđaid sáhtát ohcat njuolga Eanandoallodoaimmahagas, ja lea Eanandoallodoaimmahat mii dahká mearrádusa. Sámediggái eai leat várrejuvvon ruđat dás. Golbma vuosttaža gusket boazodollui, ja njealját heive sámi organisašuvnnaide mat omd. dáhttot lágidit gurssiid, diehtojuohkindoaimmaid, gávpesuorgebeivviid ja dakkáriid.
Diehtojuohkindoaimmat mat nannejit eanandoalu gilvonávccaid
Gávcci miljovnna kruvnno juolluduvvo eanandoalu gilvonávccaid nannemii. Dát ruđat leat jurddašuvvon diehtojuohkindoaimmaide ee mielkebuvttadeamis, iešguđet biergobuvttadeamis, gilvvagárdedoalus, šaddogilvindoaimmas ja boazodoalus. Ruđaiguin sáhttá maiddái lágidit gávpedoaibmabeivviid ja semináraid dahje ráhkadit čálalaš diehtojuohkinmateriála. Ruhta sáhttá geavahuvvot diehtojuohkindoaimmaide mat gusket ekologalaš buvttadeapmái dahje fitnodatjođiheapmái mii galggašii movttiidahttit ođđa teknihkaid ja vugiid geavaheami.
Diehtojuohkindoaimmat mat buoridit nuorra ja ođđa fitnodatdolliid gilvonávccaid
Golbma miljovnna gullá diehtojuohkindoaimmaide ođđa fitnodagaid ovddideapmái eanandoalus, gilvvadoalus ja boazodoalus. Jus ruoŧa eanandoallu galgá ovdánit de dárbbašuvvojit ođđa ja nuorra fitnodatdoallit. Danin sáhttá maiddái lágidit gulahallandoaimmaid vai movttiidahttá eaiggátmolsumiid, ja vai nuorat ja iežá surggiid olbmot dahje iežá riikkaid olbmot háledišgohtet bargat ruoná ealáhusaiguin.
Diehtojuohkindoaimmat mat ovddidit oanehis biebmogálvojođáldagaid ja báikkálaš márkaniid
Čieža miljovnna kruvnno juolluduvvo doarjjan biebmogálvobuvttadeddjiide ja biebmoárvoloktendolliide oažžut lasi máhtu ja movtta ovddidit oanehis biebmogálvojođáldagaid ja báikkálaš márkaniid. Guokte miljovnna dán ruđas lea jurddašuvvon diehtojuohkindoaimmaide, ja vihtta miljovnna gurssiide ja oahpahusdoaimmaide.
Diehtojuohkindoaimmat mat veahkehit háhkat ođđa bargosajiid báikegottiide
Gávcci miljovnna kruvnno juolluduvvo diehtojuohkindoaimmaide iešguđet gávpesurggiide ja ealáhusaide báikegottiin, mas ulbmilin lea vára váldit báikegottiid riggodagain ja vejolašvuođain. Dát áŋgiruššan galgá movttiidahttit háhkat ođđa bargosajiid biebmogálvosuorggis, buvttadeamis, fuolahussuorggis, mátkeealáhusas, kultuvrras, duojis dahje bálvalussuorggis. Doaimmat sáhttet leat omd. fitnodatjođiheapmi, márkanmáhtolašvuohta, dásseárvvu mearkkašupmi, integrašuvdna ja beassan fitnodagas ja iežá jearaldagat mat guoskkahit báikegottiid doaibmasurggiid.
Eanet dieđut
Ohcan galgá leat siste ovdal njukčamánu 1 beaivvi 2016 Eanandoallodoaimmahaga e-bálvalusa bokte mii gávdno neahttasiiddus 
.
Teaksta: Eanandoallodoaimmahat
