Sámi giellaguovddáš ja Sámi diehtojuohkinguovddáš leat ovdal leamaš ráhkadan ovdaskuvlaávdnasa Jågloe – man sáhttá sullii jorgalit ”ráhkis movttegis unnoraš”. Dán giellaoahppannevvui leat dál lasihan eanet muitalusaid, giellaovddidanosiid, matematihka ja lávlluid visot sámegielaide: davvisámegillii, julevsámegillii, bihtánsámegillii, upmisámegillii ja oarjánsámegillii.

Giellasirdin buolvvaid gaskka ii dáhpáhuva dál šat nu go ovdal, daningo mánát leat nu olu ovdaskuvllas dán áiggi. Leat maiddái olu váhnemat geat eai ieža ságas sámegiela. Danin lea dehálaš ahte ovdaskuvla sáhttá doaibma mánáid sámegielarenan.

- Mis leat nu unnán sámi oahpponeavvut ja sámi pedagogat, ja mii sávvat ahte Jågloe sáhttá movttiidahttit ja leat doarjjan sámi giellaovddideapmái, lohká Ulla-Karin Sarri gii lea Sámedikki giellalávdegotti ságadoalli.

Sámi giellaguovddáš lea ilus ja giitevaš go Giella ovdaskuvla Jåhkåmåhkes dál lea juohkán minguin iežas mávssolaš giellaoahpponeavvuid. Daid leat sámi ovdaskuvlaoahpaheaddjit čohkken ja buohtalastán. Oahpponeavvuid sáhttá viežžat sametinget.se ruovttusiiddus.

- Mii leat dása čohkken buoremus osiid sámi ovdaskuvlabarggus. Eanet ávdnasat almmuhuvvojit ruovttusiiddus dađistaga go válbmanit, lohká Margareta Jonsson Sámi giellaguovddáža giellakonsuleanta.

Ulbmil dáiguin oahppoávdnasiiguin lea inspireret pedagogaid bargat sámegielain ja veahkehit loktet dohkkehusa sámi mánáid giela ja kultuvrra ektui.
 

Váldde oktavuođa

Margareta Jonsson, Sámi giellaguovddáža giellakonsuleanta
073 – 067 45 76, margareta.jonsson@sametinget.se

Ulla-Karin Sarri, Sámedikki giellalávdegotti ságadoalli
ulla-karin.sarri@sametinget.se

Giellaguovddáš gullá Sámediggái ja dan ulbmil lea ovddidit ja movttiidahttit sámegielaid geavaheami, nannet sámegielagiid, háhkat metodaid giellaealáskahttimii ja čalmmustahttit ja loktet sámegielaid stáhtusa. Giellaguovddáža vuolggasadji leat sámi dárbbut giellasealáskahttimii, ja min kantuvrrat leat Dearnas/Tärnaby ja Staares/Östersund.