Sámi giellaguovddáš deavdá 10 jagi – digitála ávvudeapmi
Sámi giellaguovddáš ávvuda 10 jagi, ja dan oktavuođas bovdet digitála giellaseminárii duorastaga skábmamánu 5 beaivvi 2020 dii. 10:00 -15:00. Prográmmas leat sáhkavuorut doaimmaid ja giellaealáskahttima birra giellaguovddáža vuosttaš 10 jagis.
Sámi giellaguovddáš bargá visot sámi gielaiguin, ja maiddái máŋgga iešguđet dásis. Lea dárbu Giellaguovddáža áŋgiruššamiidda sihke servodat-, joavko- ja indiviidadásis nannen dihte sámi gielaid ja giellageavaheddjiid. Persovnnalaš deaivvadeamit ja čoagganeamit main sámegiella geavahuvvo ja ságastuvvo leat dehálaččat dán barggus. Covid-19 dagaha ahte šaddat ávvudit 10-jagi beaivvi digitála vugiin, ja nu ožžot eanebut vejolašvuođa searvat ávvudeapmái. Ávvudanprográmmas leat logaldallamat ee. dutkiiguin, váhnemiiguin, oahpaheddjiiguin ja Sámi giellaguovddáža prošeavttaid oasseváldiiguin.
- Mii háliidit giitit visot buriid ovttasbargguid ja dan responssa ovddas maid mii dán logi jagis leat vásihan. Mii oaidnit ahte Giellaguovddáš lea leamaš positiiva fápmun, ja dál illodallat ođđa bargguide ja hástalusaide, lohká Ingegerd Vannar, Sámedikki gaskaboddosaš giellahoavda ja Sámi giellaguovddáža bargojođiheaddji.
Sámi giellaguovddáš veahkeha láhčit sámi gielaid olámuddui eanet olbmuide. Sámi giellaguovddáš bargá giellaealáskahttimiin – vai sámi gielaid sajádat servodagas nanusnuvvá. Ovttasbargu iežá sámi ásahusaiguin ja organisašuvnnaiguin lea eaktun jus galgat lihkostuvvat dáinna bargguin. Okta ovdamearka leat giellabeasit maid Giellaguovddáš ja Sámeskuvlastivra ovttas lágidit ohppiide. Ovttasbargu Sáminuorra organisašuvnnain lea maiddái mávssolaš ja lea bures menestuvvan.
Sámegiela ja iežá áitojuvvon álgoálbmot- ja unnitlogugielaid ealáskahttinrahčamušat eai noga goassege. Lea bistevaš soahti bissehit giellamolsuma ja eastadit eanetlogu gielaid vuoitimis.
- Odne ávvudit 10 jagi iluin. Muhto mii dovdat maiddái vuollegašvuođa dan dehálaš barggu ektui mii mis lea, ja Sámediggi joatká barggu doaimma viiddidemiin ja vai ásahuvvojit giellaguovddážat maiddái julev- ja davvisámi guvlui, lohká Lars Miguel Utsi, Sámedikki giellalávdegotti ságadoalli.
- Mii leat huksen nana vuođu dasa ahte ain veahkehit ja nannet ođđa ja boares sámegielgeavaheddjiid, dadjá Sylvia Sparrock, Sámi giellaguovddáža bargojođiheaddji.
Sámi giellaguovddáš ásahuvvui 2010:s ja gullá Sámedikki giellaossodahkii, ja dan kantuvrrat leat Dearnas ja Staares. Sámi giellaguovddáš ásahuvvui guhkes garra rahčamušaid maŋŋel sámiid bealis, ja guorahallamis Att återta mitt språk (SOU 2006:19) evttohuvvui ahte Sámi giellaguovddáš galggai ásahuvvot giellanannendoaibman.
Váldde oktavuođa:
Ingegerd Vannar, Sámi giellaguovddáža bargojođiheaddji, gaskaboddosaš giellahoavda 070- 298 16 61, ingegerd.vannar@sametinget.se
Sylvia Sparrock, Sámi giellaguovddáža bargojođiheaddji 070 - 646 63 99, sylvia.sparrock@sametinget.se
Lars Miguel Utsi, Sámi giellalávdegotti ságadoalli ja sadjásaš stivraságadoalli, 070-349 29 68, larsmiguel.utsi@sametinget.se
Prográmma gávnnat:
https://www.facebook.com/events/281152613079818
Sámi giellaguovddáš
Sámi giellaguovddáš lea oassin Sámedikkis, ja dan ulbmil lea ovddidit ja movttiidahttit sámegielgeavaheami, nannet sámegielagiid, ovdánahttit metodaid giellaealáskahttimii ja čalmmustahttit ja loktet sámi gielaid stáhtusa. Giellaguovddáš ovttasbargá iežá sámi ásahusaiguin ja organisašuvnnaiguin buohtalastit, dievasmahttit ja beavttálmahttit sámegiela ealáskahttima. Giellaguovddáš galgá dokumenteret ođđa metodaid, addit rávvagiid ja juohkit máhtuid. Doaimmat mánáide ja nuoraide galget earenoamážit vuoruhuvvot. Giellaguovddáš galgá bargat sámiid giellaealáskahttindárbbuid vuođul, ja dan kantuvrrat leat Dearnas/Tärnaby ja Staares/Östersund.
