Sámi giellaguovddáš lea ovttas Alfabeta lágádusain jorgalan ja bádden jienaid bivnnohis mánnágirjeáppii Sápmi Knacka på! Dát áppa lea 2015 rájes gávdnon davvi-, julev- ja oarjánsámegillii. Dál mii leat vel lasihan bihtán- ja upmisámegielaid áppii.

Lea nu hávski ahte sáhttit fállat áppa buot viđa sámegillii. Mii diehtit ahte smávvamánát leat liikon áppii, ja dat lea maid ávkkálaš váhnemiidda ja iežáide geat oahpahallet sámegiela, lohká Ingegerd Vannar, Sámedikki gaskaboddosaš giellahoavda ja Sámi giellaguovddáža bargojođiheaddji.

- Mii sávvat ahte áppa movttiidahttá ja veahkeha boahttevaš bihtán- ja upmisámegiel ságasteddjiid, lohká Anders Östergren Njajta, Sámi giellaguovddáža giellakonsuleanta.

Sámi giellaguovddáš bargá sámi gielaid ealáskahttimiin. Mánát ja nuorat vuoruhuvvojit, ja Sápmi Knacka på! áppa lea oassin metodaovdánahttimis mii galgá veahkehit addit buohkaide vejolašvuođa olahit iežaset giela visot eallináigodagain. Mánát leat min boahtteáigi ja áppain lea somá ja álki beassat oahppat váibmogiela.

- Viimmat mánáid-áppa upmisámegillii, illoda váhnen ja upmisámegieloahpaheaddji Sara Helén Persson  Gávtjávrries. Unnimus sámegielaide leat nu unnán fálaldagat, ja danin lea Sápmi Knacka på! stuora lávki ovddos.

Áppa gávdno nuvttá App Storas golggotmánu 23. beaivvi rájes.

-----------------------

Geavat áinnas dáid fáddágilkoriid sosiála mediain:

#giellavahkku2020

#giellavahkko2020

#giällavahkkuo2020

#gïelevåhkoe2020

Váldde oktavuođa

Anders Östergren, Sámi giellaguovddáža giellakonsuleanta
070 - 598 40 09, anders.ostergren.njajta@sametinget.se