- Mánát ja nuorat leat min boahtteáigi ja jus sámegieloahpahus ii doaimma ovdaskuvllas ja skuvllas de šaddá midjiide váttis deavdit Sámedikki višuvnna sámi gielaid ektui, deavdit servodaga ovddasvástádus mánáid ja nuoraid giellaoahppamis, lohká Lars Miguel Utsi gii lea Sámedikki giellalávdegotti ságadoalli.

Lea gávccát geardi go Sámediggi bidjá ovdan dilálašvuođaraportta gielaid birra, ja dat gávnnaha ahte leat ain olu hástalusat maid ferte ollašuhttit ovdalgo sámi gielat ollát dohkkehuvvojit, giellageavaheaddjit lassánit ja vejolašvuohta čállit ja lohkat šaddá lunddolažžan ja norbman.

Sámediggi bargá dál oažžut sadjái sámi giellalága ja stipeandaortnega sidjiide geat lohket sámegiela joatkkaskuvladásis ja alit dásis. Dán jagi raporttas deattuhit maiddái girjjálašvuođa ja raporta čilge got ee. Norga ja Islánda lea lokten smávvagielaid girjjálašvuođa. Guorahallamis Nästa Steg? Förslag för en stärkt minoritetspolitik leat evttohusat got sáhttá buoridit našuvnnalaš unnitloguid ja unnitlogugielaid muhto ollašuhttit sámegiela doaibmi álgoálbmotgiellan gal lea ain stuoris.

- Sámedikki višuvdna lea ahte visot sámit máhttet sárdnut, lohkat ja čállit sámegiela, ja ahte sámi gielat galget leat ealli dearvvaš gielat mat leat anus ja adnojit árvvus servodagas, lohká Lars Miguel Utsi.

Eanet aht eanet mánát dárbbašit lasi sámegieloahpahusa ovdaskuvllas, ja ovdaskuvla lea servodaga buoremus reaidu das ahte háhkat ja ovddidit eanet sámegielhubmiid. Skuvladoaimmahaga logut leat váilevaččat, ja árvideames ii boađe duohta dárbu ja vuoigatvuohta sámegiel eatnigieloahpahussii ovdan ollásit. Sin logut čájehit ahte leat unnán oahppit geat ožžot vejolašvuođa ja njulgosa lohkat sámegiela eatnigiellan, ja duohta lohku lea mihá stuorit, oaivvilda Sámi giellaguovddáš. Ja dain gielddain gos leat sámegieloahppit lea dušše goalmmádasoassi skuvllain main lea ovttasbargu Sámeskuvlastivrrain.

Rievssatlávkkážiiguin ovdána bargu sámi girjjálašvuođain maiddái Ruoŧas, ee. lea ođđa girječállisearvi Bágo čálliid siebrie huksegoahtán sámi girječálli- ja girjjálašvuođaguovddáža. Muhto goas galget sámi mánát Ruoŧa bealde beassat válljet sámegiel máinnasgirjji liikka geahppasit go fuolkemánát Norgga ja Suoma bealde?  

Sámi mánát ja nuorat leat duođaštan beroštumi giela seailluhit. Sámi giellaguovddáš lea čuovvolan ovddit nuoraidprošeavttaid ođđa prošeavttain #Instagiella #Instagiella #Instagiälla #Instagïele mas nuorat juogadit giellamovtta filmmažiiguin maid bidjet sosiála mediaide.

 - Lea hirbmat dehálaš čalmmustahttit sámegiela ja deaivvadit nuoraiguin dain arenain maid sii geavahit. Digitála reaidduiguin sáhttit ođđa vugiiguin geavahit sosiála mediaid giellaealáskahttimis, lohkaba Ingegerd Vannar ja Sylvia Sparrock geat leaba Sámi giellaguovddáža bargojođiheaddjit.

Eanet dieđuid oaččut:

Ingegerd Vannar, Sámi giellaguovddáža bargojođiheaddji, tel 0980-780 29, 070-298 16 61
Lars Miguel Utsi, Sámedikki giellalávdegotti ságadoalli, tel 0980-681 90, 070-349 29 68