ON 23 dálkkádatčoahkkin lágiduvvo Bonnas Duiskkas ja Sámedikki bealis čuovvuba Laila Öberg Ben Ammar ja stivraságadoalli Per-Olof Nutti čoahkkima. Dán jagi šiehtadallamiin leat Paris-šiehtadusa njuolggadusat váldofáddán. Paris-šiehtadusa 135 paragráfas lea okta čuokkis álgoálbmotlávddi birra, ja Bonnas lea áigumuššan soahpat mii dán lávddi sisdoallu galggašii leat.

Gaskamearálaš temperatuvra Árktalaš guovllus lea lassánan beali jođáneappot go gaskamearri máilmmis muđui. Dát liegganeapmi čuohcá hirbmat garrasit árktalaš álgoálbmogiidda daningo sii ellet nu lahka luonddu árbevirolaš ealáhusaiguin, omd. guolástemiin, boazoealáhusain, bivdduin ja dujiin. Sámi Parlamentáralaš Ráđđi (SPR) atná ahte álgoálbmogat fertejit beassat aktiivadit oassálastit dáin bargguin ja mearrádusdahkamis. Álgoálbmogiid máhttu lea erenoamáš mávssolaš ja sáhttá leat čoavddan eallevaš boahtteáigái.

Maid sáhtát don buktit dán bargui, Per-Olof Nutti?
-     Mun ieš vásihan ja dovddan dálkkádatrievdamiid váikkuhusaid beaivválaččat boazodoalus. Mun sáhtán buktit boazodoalloperspektiivva sihke ruoŧa delegašuvdnii ja álgoálbmotlávddi dálkkádatšiehtadallamiin, lohká Sámedikki ságadoalli Per-Olof Nutti guhte lea vuohččan čuovvume ON dálkkádatčoahkkima.

Čoahkkima lágideaddji Bonnas lea Fiji-stáhta, suolu Jaskes ábis gos leat eanet go 330 sullo main ásset vuollel 1 miljovnna olbmo. 2016:s hearjidii máilmmi garraseamos trohpalaš syklovdna Fiji-guovllus. Fiji ovddasteaddjit lohket álgoálbmotlávddi leat hui dehálaš áššin dálkkádatčoahkkimis.

Dálkkádatčoahkkima oktavuođas lea Sámi Parlamentáralaš Ráđđi čállán dokumeantta mas čilge sámi posišuvnna dáin šiehtadallamiin. Dokumeanttat gávnnat dás olgešbealde.

Váldde oktavuođa:
Per-Olof Nutti
070-376 31 12
Sámedikki stivraságadoalli