Prošeakta dálkkádatheivehemiin
SMHI lea Sámediggái juolludan 900 000 kr prošeaktaruhtan bargat dálkkádatheiveheami doaibmaplánain ja reaidduid ovdánahttimiin.
Doaibmaplána sisdoallu
Boahttevaš doaibmaplána galgá addit ollislaš gova das got dálkkádatnuppástusat váikkuhit boazoealáhusa ja sámi kultuvrra. Plána galgá identifiseret váttisvuođaid, ja ja inventeret ja guorahallat vejolaš doaibmabijuid. Doaibmabijuide ráhkaduvvo maiddái váikkuhusguorahallan. Visot dát galgá maid čilgejuvvot sierra raporttas.
Ulbmil
Ulbmilin lea oažžut ovdan ollislaš gova das got dálkkádatnuppástusat váikkuhit boazoealáhussii ja sámi kultuvrii, ja dasto identifiseret váttisvuođaid ja guorahallat vejolaš doaibmabijuid.
Doaibmabijuid vuođul galgá hábmejuvvot strategiija ja mihtut mat sáhttet leat veahkkin ja mearrádusvuođđun daidda doaimmaide maid Sámedikki sáhttá váikkuhit. Doaimmaid váikkuhusguorahallan dahkko ekonomalaš, biologalaš, ekologalaš ja sosiála perspektiivvas.
Čielga doaibmastrategiijain sáhttet sihke Sámediggi ja čearut ja eiseválddit bargat eastadandoaimmaiguin vai boazoealáhus nahká dustet daid dilálašvuođaid maid dálkkádatrievdamat dagahit.
Plána ulbmil lea:
- Sámediggi, čearut ja iežá berošteaddjit galget oažžut dieđuid dain váikkuhusain maid dálkkádatrievdamat mielddisbuktet boazoealáhussii ja sámi kultuvrii
- Oažžut máhtu ja gealbbu vejolaš čovdosiid birra, ja plána got daid sáhttá čađahit
- Čalmmustahttit synergiijaváikkuhusaid ja ulbmilvuostálasvuođaid iežá surggiiguin, dego omd. luonddugáhttemiin, energiijain ja industriijain.
- Čielggadit geas lea ovddasvástádus iešguđet doaimmaide, politihkalaččat, eiseválddis Sámedikkis ja beroštusorganisašuvnnain ja čearuin
- Hábmet gulahallanplána mii inkludere oktavuođa iežá eiseválddiiguin ja beliiguin dán suorggis.
Čađaheapmi
Barggu čađaheamis galget leat stivrenjoavkočoahkkimat, ja maiddái jearahallamat ja deaivvadeamit čearuiguin ja sámi organisašuvnnaiguin, sihke fysalaš čoahkkimat ja telefonjearahallamat. Galgá maiddái leat gulahallan gielddaiguin ja iežá eiseválddiiguin, omd. Luonddugáhttendoaimmahagain, Eanandoallodoaimmahagain, Energiijaeiseválddiin, Báktedoaimmahagain, SGU:in, namalassii eiseválddiiguin geain lea ovddasvástádus áššiin mat sakka váikkuhit boazodollui.