Ednamdáfoprográmma

Jus sidá boatsojäládusvidnudagáv jali ietjá sáme vidnudagáv álgadit de máhtá åhsåt

• álgadimdårjav

Jus sidá ietjat dálásj vidnudagáv åvdedit de máhtá åhtsåt

• investerimdårjav dårjav ålgop dievnastusáj oasstemij

Jus dárbaha kursan jali ietjá åhpadusán vádtset de máhtá åhtsåt

• gelbugisvuohtaåvddånimev

Jus sidá ednamdáfoåvdedim prosjevtav jali aktisasjbarggoprosjevtav aktan iehtjádij bajásanedit de máhtá åhtsåt

• prosjäktadårjav

Jus sidá ednamdáfooasev ällosujttoguovlon sujttit de máhtá åhtsåt

• birásmávsálvisáv luonndo- ja kultuvrrabirrasijda ällosujttoguovlon

Gájkbadjásasj ulmme
Ednamdáfoprográmma dago biednigahteduvvi EUa budjehtas ja rijkalattjat. Prográmmaájgen biednigahteduvvi jårbbå 35 miljarda kråvnå. Gájkbadjásasj ulmme ednamdáfoprográmmaj le sämmilágásj gå svieriga ednamdáfopolitijkkaj, d.j. åvdedit ednamdáfo ekonomalasj, ekologalasj ja sosiálalasj nanos åvddånimev. Ulmme gåbttjå biebmoj nanos buvtadimev, bargojt ednamdáfon, vieledit dajvak vidjurijda ja nanos åvddånimev. Ednama luonndo- ja kultuvrraárvo galggi suoddjiduvvat ja birrasij nievrijt buktet galggá giehpeduvvat.

Sámedigge dårjafábmudahka
Ednamdáfoprográmma biednigahteduvvá EUas bájken láhkkáj ja juohkka sebrulasjstáhtas láhkkáj. 2007 ådåjakmáno rájes Stáhta Ednambarggodåjmadahka le tjuottjudusfábmudahka prográmmaj. Lenastivra ja Sámedigge li dårjafábmudagá ma rájadum ássjijt giehtadalli ja mierredi. Sáme prosjäktaniehke ja vidnudagá galggi Sámedikkijn rádedit. Jus Ednambarggodåjmadagá ådåsbrevav diŋgo sijá webbabiele baktu de dajvvalakkoj máhtá diededimev ednamdáfoprográmma birra oadtjot.

Sámedikke ållidimstrategiddja
Jåvsådittjat buoremus båhtusijda Sámedikken le ållidimstrategiddja gåktu vidnudak- ja prosjäktadårjajt, dårjajt gelbugisvuohtaåvddånibmáj ja válljidum birrasij galggi juogeduvvat. Strategiddja le vuododum äláduspolitijkalasj doajmmaprográmmaj mij le hábbmiduvvam aktijbargon sáme äládusájn, idealissta organisasjåvnåj j.i. ja ållestjåhkanimes dåhkkiduvvam. Åtsålvisá vuoroduvvi dan milta gåktu åvdedi ulmijt ållidimstrategidjan ållidit.